بصوا يا جماعه الأبهات لما يحبوا يعملوا فيها اصحاب ولادهم ويقعدوا كده يتكلموا مع بعض شويه فى ساعه صفا ( طبعا مش بتاع صفاء ابو السعود اللى بيجى على ART )
عاده تلاقيهم يكدبوا على ولادهم ويغوطوا اوى فى الكلام ودايما يبدءوا كلامهم بكلمه ( لما كنت فى سنك كده )
يعنى مثلا تلاقوا الأب يقول لأبنه : انا لما كنت فى سنك كده كنت دايما باطلع الأول على المدرسه
( مش عارف لما كل الأبهات بيقولوا كده امال مين اللى كان بيطلع التانى ، واللى ينرفز اكتر انك تلاقيه شغال مثلا مدرس او فران انا مش قصدى اعيب على اللى بيشتغلوا الشغلانات دى بس انا قصدى لما هوا كان بيطلع الأول ليه مش بقى مهندس ولا دكتور )
ما علينا
الكدبه التانيه : تلاقى الأب يقول لأبنه : انا لما كنت فى سنك
كنت لعيب كوره كبييييير
ده انا كنت باخد الكوره على صدرى اطلعها من مناخيرى
( على اساس انه بيلعب بكوره كليوبترا )
ما علينا
الكدبه التالته ودى مهمه جدا : تلاقى الأب يقول لأبنه : انا لما كنت فى سنك كانت كل البنات هاتتجنن وابص لوحده فيهم ودا طبعا لأنى كنت شبه حسين فهمى ( بس لما كبر طبعا حسين فهمى فضل زى ماهوا لكن الراجل ده لما كبر قلب على اسماعيل ياسين )
المهم، شعرى اصفر وناعم ( بس اتحرق فى الشمس فبقى اسود وخشن وزى سلك الألمونيا )
وعنيا خضرا ( معلش استوت بمرور الزمن )
للعلم الموضوع ده للضحك فقط ولا للإستهزاء